MADUO: 80
NAKO: 2 diura
Pampiri e, e na le ditsebe di le 5.
PAMPIRI YA BOBEDI (P2)
DITAELO
Pampiri e, e arogantswe ka dikarolo di le THARO e leng A, B le C.
KAROLO YA A: Tlhamo.
KAROLO YA B: Ditlhangwa tse dileele tsa tirisano gammogo le ditlhangwa tse di dirisang mekgwa e e farologaneng ya tlhaeletsano.
KAROLO YA C: Ditlhangwa tse dikhutshwane tsa tirisano/tshupetso/ tshedimosetso/pono/gammogo le ditlhangwa tse di dirisang mekgwa e e farologaneng ya tlhaeletsano.
Baithuti ba tshwanetse go araba potso e le NNGWE go tswa mo karolong nngwe le nngwe.
Karolo nngwe le nngwe e simololwe mo tsebeng e ntšhwa mme kwa bokhutlong jwa karabo moithuti a thalele.
Tlogela mola mo magareng a dikarolo tsa gago.
Kwala sentle ka mokwalo o o buisegang.
Tlhokomela mopeleto le popego ya dipolelo.
Baithuti ba tla abelwa maduo a go dira lenaneo la thulaganyo, go tsereganya le go buisa tiro ya bona pele ba araba dipotso.
KAROLO YA A: TLHAMO
POTSO 1
Kwala tlhamo ya boleele jwa mafoko a a ka nnang 200 - 250 ka ga NNGWE fela ya ditlhogo tse di latelang kgotsa ditshwantsho tse di neilweng. Fa o dirisa setshwantsho go kwala tlhamo, se neele setlhogo se se maleba.
Mafelo a a gololesegileng mo tlhabololong ke dirai tsa bosenyi le borukhutli.
KGOTSA
Bosenyi, dipolaano, dipetelelo le dikgothoso tsa mabenkele le tsa dijanaga tsa madi a a kwa godimo di tshosetsa ditiragalo tsa 2010 gonne go bontsha e kete mapodisi a retelelwa ke go laola maemo.
KGOTSA
Lefelo la boitapoloso le ke ileng ka le itumelela.
KGOTSA
Selo se se bosula se se kileng sa diragala mo sekolong sa rona.
KGOTSA
Leba setshwantsho se se fa tlase , mme o kwale tlhamo ka ga sona.
KGOTSA
Nagana tiro e o ka ratang go e dira fa o fetsa sekolo. Fana ka mabaka mangwe a a dirang gore tiro e e nne e o e ratang thata. Kwala tlhamo go tlhalosa se.
PALOGOTLHE YA KAROLO YA A :
KAROLO YA B: DITLHANGWA TSE DILEELE TSA TIRISANO
POTSO 2
Araba potso e le NNGWE fela mo karolong ya B, karabo e nne boleele jwa mafoko a a ka nnang 80 - 100.
O bone tšhono ya go amogela le go neelana ka marobalo le dijo tsa ditlhopha tsa kgwele ya dinao di le lesome go tswa mo nageng ya Aforika Borwa ka bophara, mme o tshwanelwa ke go golagana le motlhankedi wa dikamano wa naga e. Mo kwalele lekwalo mme o dire thulaganyo le ena.
KGOTSA
Kwala mmuisano o mo go ona o tla buisanang le leloko la lekgotla la sekolo (SGB), ka magodu a a utswang dithoto tsa sekolo, mme a di rekisetsa baagi/ batho ba mo motseng.
KGOTSA
Kwala lekwalo la botsalano o le lebise kwa go malomaago, o mo leboge ka fa a go thusitseng ka teng go duela madi a loeto lwa sekolo.
KGOTSA
O ne o tsamaya gaufi le mmila mongwe mo toropong ya ga lona. Motho o ne a thulwa ke koloi mme a latlhegelwa ke botshelo. Kwala pegelo e khutshwane ka ga ditiragalo tsa letsatsi leo, o e lebise kwa sepodising.
PALOGOTLHE YA KAROLO YA B:
KAROLO YA C: DITLHANGWA TSE DIKHUTSHWANE TSA TIRISANO
POTSO 3
Araba potso e le NNGWE fela mo karolong ya C. Karabo e nne boleele jwa mafoko a a ka nnang 60 - 80.
Thala posekarata ya keleletsomasego o e lebise kwa baithuting-ka-wena o ba eleletse masego mo ditlhatlhobong tsa bona tsa mophato wa bolesomepedi.
KGOTSA
Kwala karata ya taletso e mo go yona o laletsang tsala ya gago go tla go tsenela keteko ya moletlo wa mmino wa setso o o rulagantsweng ke seteišene sengwe sa radio kwa letamong la Mmatlasagagwe mo kgweding e e tlang.
KGOTSA
Go na le kopano ya mokgatlho wa lekgotla la baithuti la sedika sa lona, mme o kopilwe ke mokgatlho go neelana ka tshedimosetso ya tsela go tloga kwa boemeladipalangweng go fitlha kwa lefelong la kopano. Thala tshedimosetso eo o akaretsa dilo di tshwana le maina a mebila, dikolo, dikereke, matshwao a tsela le tse dingwe.
PALOGOTLHE YA KAROLO YA C :
PALOGOTLHE:
